4’emîn Konferansa YRJ Bi Beşdariya 150 Delegeyan tê lidarxistin
Yekitiya Ragihandina Jin (YRJ) konferansa xwe ya 4’emîn, bi dirûşma “Bi mezinkirina YRJ’ê em ê bibin dengê şoreşa jinê” li dar dixe. Konferans li hola Zanîngeha Rojava ya li bajarê Qamişlo yê kantona Cizîrê ya Bakur û Rojhilatê Sûriyeyê bi beşdariya 150 delegeyan tê lidarxistin.
Konferans bi beşdariya 150 delegeyan, hevseroka Daîreya Têkiliyên Derve ya Rêveberiya Xweser Îlham Ehmed, nivîskarên jin, nûnerên Kongra Star, nûnerên dezgehên jinan ên Rêveberiya Xweser, Meclisa Sûriyeya Demokratîk (MSD), TEV-DEM’ê hate lidarxistin.
Konferansê bi deqeyeke rêzgirtina ji bo giyanê şehîdan dest pê kir û piştre berdevka YRJ’ê Arîn Siwêd axaftina vekirinê kir û bixêrhatina beşdaran kir.
Piştî axaftina vekirinê ji bo rêvebirina konferansê dîwanek ji 5 kesan hat hilbijartin.
Dê li ser xebatên YRJ’ê sînevîzyon bê pêşandan, li ser navê Rêveberiya Xweser û Kongra Star axaftin bê kirin, rapora xebatên 4 salan bê xwendin, rewşa rêxistinî û rêzikname bên nîqaşkirin, meclis bê hilbijartin û bi daxuyaniyekê bi dawî bibe.
Ragihandina Jinên Bakur û Rojhilatê Sûriyeyê, di 28’ê Hezîrana 2020’an de bi beşdariya 86 delegeyan konferansa xwe ya sêyemîn li dar xist û avakirina YRJ’ê ragihand. Niha 557 rojnamegerên jin endamên YRJ’ê ne. Li gorî rêziknameya YRJ’ê her du salan carekê konferans pêk tê, lê ji ber rewşa ewlehî û êrişên li ser herêmê ev 4 salin konferans pêk nehatiye.
