{"id":1359,"date":"2023-09-25T09:50:01","date_gmt":"2023-09-25T09:50:01","guid":{"rendered":"https:\/\/yra-ufm.com\/ku\/?p=1359"},"modified":"2023-09-25T09:50:01","modified_gmt":"2023-09-25T09:50:01","slug":"yraye-ji-bo-sehadeta-rojnamevan-u-niviskar-seyid-evran-daxuyani-da","status":"publish","type":"post","link":"https:\/\/yra-ufm.com\/ku\/index.php\/2023\/09\/25\/yraye-ji-bo-sehadeta-rojnamevan-u-niviskar-seyid-evran-daxuyani-da\/","title":{"rendered":"YRA\u2019Y\u00ca JI BO \u015eEHADETA ROJNAMEVAN \u00db NIV\u00ceSKAR SEY\u00ceD EVRAN DAXUYAN\u00ce DA"},"content":{"rendered":"

\"\"<\/p>\n

Yek\u00eetiya Ragihandina Azad (YRA) ji ber \u015fehadeta Rojnamevan Sey\u00eed Evran li ber navenda \u00c7and \u00fb Huner\u00ea ya Mihemed \u015e\u00eaxo ya bajar\u00ea Qami\u015flo daxuyan\u00ee da.
\nDaxuyan\u00ee bi be\u015fdarb\u00fbna dehan rojnamevan\u00ean her\u00eam\u00ea ji aliy\u00ea Hevserok\u00ea YRA\u2019y\u00ea Dilyar Ciz\u00eer\u00ee ve hate xwendin.<\/p>\n

\"\"
\nDaxuyan\u00ee wiha ye:<\/p>\n

Stuneke din a \u00c7apemeniya Azad a Kurdistan\u00ea ber bi b\u00eadaw\u00eeb\u00fbn\u00ea ve bar kir. Me r\u00eaheval\u00ea xwe y\u00ea rojnamevan, niv\u00eeskar \u00fb \u015fore\u015fger Sey\u00eed Evran 22\u2019y\u00ea \u00celona 2023\u2019yan de winda kir. Heval\u00ea me ku ev demek dir\u00eaj b\u00fb bi nexwe\u015fiya dil ketib\u00fb, li nexwe\u015fxaneya dihat dermankirin, \u015feh\u00eed b\u00fb.
\nEw b\u00eer \u00fb hafizeya \u00c7apemeniya Azad a 30 sal\u00ean dawiy\u00ea b\u00fb. Li ser v\u00ea r\u00eaya bi r\u00fbmet \u00fb giranb\u00fbha b\u00fb r\u00eawiyek\u00ee \u00e7alak y\u00ea b\u00eawestan. Azwer\u00ee, xebata ji bo ron\u00eekirina civakan \u00fb biryardariya w\u00ee ya t\u00eako\u015f\u00een\u00ea hem\u00fb asteng\u00ee \u00fb zehmetiy\u00ean derketine p\u00ea\u015fiya w\u00ee ji hol\u00ea rakirin. Bi sekin, liv \u00fb tevger \u00fb p\u00ean\u00fbsa xwe, di r\u00fbpel\u00ean \u00e7apemeniya azad de cihek\u00ee b\u00eahempa girtiye.
\nR\u00eaheval\u00ea me Sey\u00eed hema b\u00eaje hem\u00fb jiyana xwe xist xizmeta t\u00eako\u015f\u00een, rastiya \u015fer \u00fb berxwedana li welat\u00ea xwe. Bi me\u015fa xwe ya \u015fev \u00fb rojan gelek merheley\u00ean gir\u00eeng derbas kirin \u00fb rastiya v\u00ea erdn\u00eegariy\u00ea raxist ber \u00e7avan.
\nHeval\u00ea Sey\u00eed m\u00eel\u00eetanek\u00ee p\u00ea\u015feng \u00ea Tevgera Azadiy\u00ea ya Kurdistan\u00ea \u00fb \u00c7ameniya Azad b\u00fb. Li \u00e7ar aliy\u00ean Kurdistan\u00ea bi p\u00eanusa xwe rastiya civaka Kurd \u00fb t\u00eako\u015f\u00eena azadiy\u00ea ji hem\u00fb c\u00eehan\u00ea re ragihand.
\nSey\u00eed Evran bi nav\u00ea xwe y\u00ea rast Sey\u00eed Mehm\u00fbd Evran sala 1969\u2019an li nav\u00e7eya H\u00ean\u00ea ya Amed\u00ea \u00e7av\u00ean xwe li jiyan\u00ea vedike. Di nava malbateke ji kevne\u015fopiya serhildana \u015e\u00eax Se\u00eed de mezin dibe.
\nDi sal\u00ean ciwant\u00ee \u00fb xwendekariy\u00ea de t\u00eako\u015f\u00eena azadiy\u00ea nas dike \u00fb di nava ref\u00ean w\u00ea de cih\u00ea xwe digire. Dema li Zan\u00eengeha \u00c7ukurovay\u00ea dixw\u00eene, yek ji p\u00ea\u015feng\u00ean \u00c7apemeniya Azad \u00fb \u015eore\u015fger Gurbetelli Ersoz ku w\u00ea j\u00ee li heman zan\u00eengeh\u00ea dixwend, nas dike. Bi v\u00ea naskirin\u00ea re dibe \u015fagirtek Gurbetelli Ersoz \u00fb ezmunek gir\u00eeng digire.
\nHeval Sey\u00eed bi v\u00ea xwestek \u00fb heyecan\u00ea sala 1990\u2019\u00ee li war\u00ea serhildan \u00fb berxwedan\u00ea Amed\u00ea, be\u015fdar\u00ee nava ref\u00ean t\u00eako\u015f\u00eena azadiy\u00ea dibe. D\u00eeroka bi \u00ea\u015f a welat berpirsyariyeke mezin dide ser mil\u00ean w\u00ee, lewma ew j\u00ee bi v\u00ea zaneb\u00fbn\u00ea tevdigere \u00fb li Tirkiye \u00fb Bakur\u00ea Kurdistan\u00ea dest bi xebat\u00ean \u00e7apemeniy\u00ea dike.
\nDi sal\u00ean her\u00ee dijwar \u00ean ku li Bakur\u00ea Kurdistan\u00ea \u00eari\u015f\u00ean li ser gel\u00ea Kurd z\u00eade dib\u00fbn, gund dihatin \u015fewitandin, rojnamevan di nava kolanan de dihatin ku\u015ftin, d\u00eesa bi hezaran kesayet\u00ean p\u00ea\u015feng dihatin girtin \u00fb ku\u015ftin de, r\u00eaheval Sey\u00eed li gel heval\u00ean xwe b\u00eay\u00ee dudil\u00ee xebatan dime\u015f\u00eenin \u00fb rastiy\u00ea ji c\u00eehan\u00ea re radigih\u00eenin. Di v\u00ea r\u00eaya dijwar de \u00e7end caran ji aliy\u00ea dagirkeran ve t\u00ea bin\u00e7avkirin \u00fb girtin.
\nDema navenda rojnameya Ozgur Ulke ya li Stenbol\u00ea \u00fb ofis\u00ean w\u00ea y\u00ean Enqere \u00fb Amed\u00ea 3\u2019\u00ea Kan\u00fbna 1994\u2019an di heman \u015fev\u00ea de hatin bombekirin, r\u00eaheval Sey\u00eed j\u00ee li navenda gi\u015ft\u00ee ya rojnamey\u00ea wek\u00ee Berpirsyar\u00ea Kar\u00ean Niv\u00ees\u00ea erk dime\u015f\u00eene. Di w\u00ea \u00ear\u00ee\u015f\u00ea de heval Sey\u00eed j\u00ee li gel 23 heval\u00ean xwe bir\u00eendar dibe.
\nDi demeke ku mirov ditirsiyan rojanmey\u00ea bixw\u00eenin de ew b\u00eay\u00ee dudil\u00ee v\u00ea xebat\u00ea dime\u015f\u00eene. Di oxira e\u015fqa heq\u00eeqet \u00fb azadiy\u00ea de gelek caran bi mirin\u00ea re r\u00fb bi r\u00fb dim\u00eene.
\nDi \u00e7ar\u00e7oveya erka xwe ya naskirin \u00fb ragihandina rastiya welat\u00ea xwe de, pi\u015ft\u00ee demek\u00ea ber\u00ea xwe dide \u00e7iyay\u00ean Kurdistan\u00ea \u00fb bi p\u00ean\u00fbsa xwe heq\u00eeqata t\u00eako\u015f\u00eena azadiy\u00ea vedib\u00eaje. Li ser \u015fopa p\u00ea\u015feng\u00ean xwe y\u00ean weke Gurbetelli Ersoz li \u00e7iyay\u00ean azad bi salan jiyan \u00fb t\u00eako\u015f\u00eena ger\u00eela l\u00eakol\u00een kir \u00fb ji gel\u00ea Kurd \u00fb c\u00eehan\u00ea re ragihand. Di v\u00ea \u00e7ar\u00e7ovey\u00ea de li ser mijar\u00ean akadem\u00eek, d\u00eerok\u00ee \u00fb w\u00eajey\u00ee de j\u00ee bi dehan niv\u00eesan diniv\u00eesine \u00fb tevkariyek gir\u00eeng dide ar\u015f\u00eeva \u00e7apemeniya azad. R\u00eaw\u00eetiya xwe ya di v\u00ea r\u00ea de j\u00ee, bi nav\u00ea \u201cR\u00eawitiyek Ber Bi Qeraxa Jiyan\u00ea ve (Hayat\u0131n K\u0131y\u0131s\u0131na Yolculuk)\u201d dike pirt\u00fbk.
\nR\u00eaheval Sey\u00eed ne ten\u00ea li Kurdistan \u00fb \u00e7iyay\u00ean w\u00ea, li gelek welat\u00ean ku Kurd l\u00ea dij\u00een j\u00ee, erka ragihandin\u00ea dime\u015f\u00eene. Li welat\u00ean ber\u00ea y\u00ean Sovyet\u00ea, Ermenistan \u00fb Rusyay\u00ea li ser rew\u015fa civaka Kurd ya li wan her\u00eaman \u00fb kesayet\u00ean navdar l\u00eakol\u00eenan dike. L\u00ea bi w\u00ea yek\u00ea j\u00ee qayil nabe, li her erdn\u00eegariyek Kurdistan\u00ea ku liv \u00fb tevgerek \u015fore\u015fger\u00ee hebe, ber\u00ea xwe dide wir.
\nDema sala 2012\u2019an li Rojava p\u00eala \u015fore\u015f\u00ea bilind dibe, r\u00eaheval Sey\u00eed j\u00ee ber\u00ea xw\u00ea dide v\u00ea xak\u00ea. Li aliyek\u00ea rastiya \u015fore\u015f\u00ea vedib\u00eaje \u00fb diniv\u00eese, li aliy\u00ea din j\u00ee di avab\u00fbn \u00fb saz\u00fbmaniya xebat\u00ean \u00e7apemeniy\u00ea de rolek sereke dil\u00eeze. Ji D\u00earik\u00ea heta Efr\u00een\u00ea li tevahiya erdn\u00eegariya her\u00eam\u00ea gav bi gav digere, p\u00eavajoya \u015fore\u015f\u00ea di\u015fop\u00eene \u00fb bi dehan \u015fagirtan perwerde dike. Bi v\u00ea xebata xwe dibe yek ji st\u00fbn\u00ean \u015fore\u015fa Rojava \u00fb \u00e7apemeniya \u015fore\u015f\u00ea. V\u00ea berpirsyariya xwe ya serxistina \u015fore\u015f\u00ea, rol \u00fb gir\u00eengiya \u00e7apemeniy\u00ea heta k\u00ealiya daw\u00ee ya jiyana xwe j\u00ee bi serket\u00ee dime\u015f\u00eene.
\nHeval\u00ea Sey\u00eed Evran ji sala 2020\u2019an ve bi pirsgir\u00eak\u00ean tenduristiy\u00ea t\u00eako\u015f\u00een dikir. Du caran kr\u00eeza dil derbas kir, lewma ne\u00e7ar ma ku \u00e7end caran emeliyat bibe. Tevi pirsgir\u00eak\u00ean xwe y\u00ean tunduristiy\u00ea j\u00ee, b\u00eanavber xebat\u00ean xwe me\u015fandin \u00fb ji co\u015f \u00fb morala xwe ti\u015ftek winda nekir.
\nHer\u00ee dawiy\u00ea nexwe\u015fiya w\u00ee d\u00eesa ser\u00ee hilda \u00fb zor li bedena w\u00ee kir, lewma ev demek b\u00fb li nexwe\u015fxaney\u00ea dihat dermankirin. L\u00ea mixabin tev\u00ee hem\u00fb hewldanan j\u00ee, sibeha 22\u2019\u00ea \u00celon\u00ea dil\u00ea w\u00ee sekin\u00ee \u00fb ji nava me bar kir.
\nHeval\u00ea Sey\u00eed Evran j\u00ee m\u00eena t\u00eako\u015fer\u00ean \u00e7apemeniya azad y\u00ean wek\u00ee Ap\u00ea M\u00fbsa, Gurbetell\u00ee Ersoz, Xel\u00eel Dag, N\u00fbjiyan Erhan, Deniz Firat, Dil\u00ee\u015fan \u00ceb\u00ee\u015f \u00fb bi dehan \u015feh\u00eed\u00ean din di r\u00eaya heq\u00eeqet \u00fb azadiy\u00ea de b\u00fb me\u015falek ku r\u00eaya me ron\u00ee dike. Ji \u015fopdar\u00ean riya ron\u00eekirin\u00ea m\u00eerateyek mezin hi\u015ftiye. Em j\u00ee weke \u015fopdar\u00ean \u015fervan\u00ean p\u00ean\u00fbsa azad soza mezinkirin \u00fb berfirehkirina v\u00ea t\u00eako\u015f\u00een\u00ea \u00fb heq\u00eeqet\u00ea didin. R\u00eaya wan w\u00ea her tim me ron\u00ee \u00fb zana bike.
\nYek\u00eetiya Ragihandina Azad (YRA)<\/p>\n